აღმოსავლური ორთაბრძოლები
Mon Ami
31 აგვ 2013, 22:49
აღმოსავლური ორთაბრძოლების სისტემებს მრავალსაუკუნოვანი ისტორია აქვს და მოზარდის განვითარების სამ ძირითად ასპექტს მოიცავს - ფიზიკურს, გონებრივსა და სულიერს.

ფიზიკური - ეფუძნება რა ანატომიურად და ფიზიოლოგიურად სწორად გათვლილ მოძრაობებსა და დგომებს, მოზარდებში ანვითარებს მოქნილობას, კოორდინაციასა და სისწრაფეს. გაზრდილი კუნთური ტონუსისა და სახსრების მოქნილობის ხარჯზე საყრდენ-მამოძრავებელი სისტემა ოპტიმალურად მუშაობს, რაც თავისთავად აუმჯობესებს უპირობო რეფლექსების ისეთ მნიშვნელოვან ფუნქციებს, როგორიცაა სუნთქვა და მუცლის ფარის დაცვის რეფლექსი. სახსრების ვარჯიშები და მრავალჯერადი გაჭიმვები ხელს უშლის სქოლიოზის განვითარებას და ზრდის ფიზიკურ გამძლეობას.

გონებრივი - სხეულის, მოძრაობისა და მოქმედების გაცნობიერება აღმოსავლური ორთაბრძოლების სისტემების შესწავლის საფუძველია. სპეციალური სავარჯიშოები (კატა, ტაო, პირობითი მრავალსვლიანი კომბინაციები) აძლიერებს გარემოს აღქმის, შეფასებისა და ანალიზის უნარს, ხელს უწყობს სწრაფი, გაცნობიერებული გადაწყვეტილებების მიღების ჩვევის გამომუშავებას.

სულიერი - დგომების, მოძრაობების მრავალჯერადი გამეორება, სავარჯიშო პროცესში წარმოქმნილი, აგრეთვე სპეციალურად შერჩეული სხვადასხვა ფიზიკური თუ სულიერი წინააღმდეგობის გადალახვა ხელს უწყობს ორგანიზებულობისა და პასუხისმგებლობის გრძნობების ჩამოყალიბებას, ზრდის შრომისუნარიანობას, რაც მნიშვნელოვანი წინაპირობაა მოზარდების სწორი სულიერი აღზრდისა და განვითარების, საზოგადოებაში მათი ინტეგრაციისა და თვითრეალიზაციის პროცესებისათვის.
---------------